奧利斯已成拜仁進攻靈魂。(Getty Images)

周一(12日)凌晨德甲，拜仁慕尼黑延續上半季強勢，新年第1擊即喺主場以8比1大破禾夫斯堡，喺德甲拋離次席多蒙特11分，奪冠係遲早問題。

拜仁5分鐘就靠對手擺烏龍領先，但13分鐘被追平，以為會有一番激戰，但拜仁始終技高「幾」籌，30分鐘米高奧利斯傳中，路易斯迪亞斯頭槌頂入，拜仁半場領先2比1。

換邊後拜仁踩油，奧利斯50分鐘入波，3分鐘再逼到對手擺烏龍，之後拉菲爾古里路、哈利卡尼、奧利斯同哥列斯卡分別入波，為拜仁取得8比1大捷。

奧利斯今場有2入波1助攻，獲選為最佳球員。據Opta統計顯示，奧利斯登陸德甲踢50場交出24次助攻，係德甲有紀錄以來(2004年)，頭50場賽事最多助攻球員，威力驚人。

拜仁教練高柏尼賽後大讚球隊作戰態度：「8比1贏禾夫斯堡唔簡單，上半場就好難踢。當我哋贏到6比1、7比1，球員仍然努力奔跑同逼搶，呢一點令我好欣賞。」

最強博彩盤路過關神器《串績王》：http://win.on.cc/football/